「股壇長毛」David Webb持股嘅細價股隆成（1225）最近改名兼換主席。隆成原本以產銷嬰兒車同幼兒用品為主，近年轉型，做埋地產、金融，公司名稱由隆成集團改為隆成金融，仲搵來康宏金融（1019）前行政總裁（CEO）麥光耀過檔做主席兼CEO，似係要發大嚟搞。
Webb雖然持有隆成，但未必好滿意呢單投資，事關佢原先持有呢隻股約8%，公司舊年忽然以公開發售形式一供三集資，Webb曾炮轟公司刻意攤薄其他股東權益。聯交所資料冇顯示佢最新持股情況，唔知佢有冇參與供股。
不過隆成呢幾個月就相當活躍，接連提出新收購，包括買入一個內地互聯網汽車金融理財平台，仲有海南三亞一幅地做休閒度假村，瓣數多多。新主席麥光耀做會計出身，2014至2015年做過隆成獨董，𠵱家做話事人，冇難度喇。