杜利萊重返香港剛戰開始上陣，全日只騎方廐「誰可拼」，早段竟大力催策上前與同主馬「兵威振」鬥燒，串成包尾Q，騎法都幾礙眼，賽後報告杜利萊自己都話做錯咗，競賽小組更話騎法已引起關注，批評佢未達到大家對資深騎師應有嘅期望，復出頭炮搞成咁，真係估唔到。
不過今期(6日)方嘉柏繼續支持杜利萊，其中頭場「勁風」一連兩仗同程泥地1200米，由羅理雅獲亞季各一，表現稱職，上仗更只輸條頸，最終只不敵少負18磅的「執子之手」屈居亞軍，今仗換上杜利萊執韁，排6檔理想，阿萊一定唔再衰得，希望佢生生性性打番場爭氣波。
「勁風」對手中，初跑泥地「機緣再現」要留意，至今5戰草地最叻第8，本來不值一提，但去年12月中仍喺姚本輝馬房時，於1200米泥閘狂勝逾8個馬位，走勢令人眼前一亮。
「機緣再現」轉投李易達後，上月底亦試泥地大閘，末段加以考驗即交出強橫後勁跑第一，走勢夠晒說服力。當然，試閘唔係真正比賽，不過同父馬「好爽趣」、「和諧氣氛」及已退役嘅「正隆」等都擅長泥地，睇嚟「機緣再現」未必會例外。