黃耀明前晚在旺角麥花臣場館舉行「美麗的呼聲」演唱會尾場騷，他在台上講到香港時百感交集：「好多人話香港已經死咗，我喺香港住咗超過半個世紀，我好唔捨得香港變成咁，希望擁有權力嘅人有更多智慧聽香港人聲音，百幾年前割讓咗畀英國人，十幾年前還番畀中國，我哋都係冇聲出，我哋慣咗冇聲出，俾人話事俾人做代表。」
不甘被代表的明哥激動到哭了：「我覺得今日，我哋唔可以再被代表，要講出我哋想香港係乜嘢香港，我哋要話畀上面嘅人聽，香港係應該由香港人去話事。」完騷後明哥接受訪問，他感觸說：「見到香港咁好心痛，真正嘅和諧同太平人人都想，但𠵱家乜嘢心機都冇啦，就連我都冇心機做嘢。」
阿澤爆粗搞氣氛
至於清談環節「龍門陣」就請到杜汶澤、林日曦、立法會議員兼前亞視藝員陳志全、ViuTV創作部經理袁志偉做嘉賓，主題是電視台之死，阿澤激動到三度爆粗。陳志全提到當年他在亞視是當紅主持，問有沒有人看過他的節目時，同台的阿澤爆粗搞氣氛：「睇過我就多，睇過你，X！」陳志全問觀眾：「亞視死咗之後點呢？TVB又會唔會死呢？有冇人日日睇TVB？」全場即時零反應，當問到是否很久沒看TVB時，全場則拍爛手掌。
之後阿澤講到TVB時再爆粗：「細個睇電視好被動，6點播《IQ博士》，𠵱家做乜要等你6點箒，幾時想開心咪開Apps囉，好似明珠930播《鐵金剛》，X，𠵱家我開個電話都睇得到啦，做乜要睇你明珠930吖，不如我今晚睇黃耀明。」陳志全謂本想搵余詠珊做嘉賓，但她放假：「其實都有搵王維基，不過佢近排申請牌照要低調啲，大家都知，方丈好小器，梁振英𠵱家都低調㗎！」阿澤做口形爆粗：「戇X」全場爆笑。
採訪：黃曉妍
攝影：陳慧安