前晚愚人節一齊目擊ATV斷link一刻嘅香港人，應該有好多其實係近年第一次睇亞視；好似我咁，都仲未識分本港台同亞洲台有乜分別，於是將第一次同最後一次喺最短時間之間打包，用一分鐘selfie加一分鐘懷念，完，轉台。無感情嘅告別其實係可以好快搞掂，第二朝瞓醒，又可以準備心情向另一樣集體回憶鞠個躬！
睇TVB嘅報道，先知原來ATV都有年輕一代fans，話說「18歲扑扑脆」嘅Michael幾年前竟然對亞視發生興趣，仲要對越舊嘅節目越有興趣，於是摷到去麗的電視年代，專煲歲月留聲台嘅經典重溫，仲要儲埋當年電視台出嘅周刊，再喺網上公諸同好，結果仲畀佢識咗好多已退隱嘅藝員，做埋朋友。話說當電視台安排佢同偶像羅樂林（圖）見面嘅時候，第一下握手時好明顯Michael熱情好多，不過傾完一輪之後，當羅樂林發現Michael仔係認真兼有些少學術feel嘅時候，我覺得感動啲嘅係羅樂林囉。
表面嚟睇呢個只係一個微不足道嘅追星故事，但睇真啲，佢追緊嘅係冇人願意睇多眼嘅另類好嘢，我懷疑如果Michael仔早啲出世或者再細啲就開始睇亞視，隨時可以改變ATV嘅命運。因為熱情係可以感動到人嘅，有一班正常嘅fans支持同鞭策，分分鐘可以刺激到班話事人行番正路。
大部份人都支持大球會，但小球隊亦有小球隊嘅魔力，你支持隊波越俾人睇小，你就要嗌得越大聲，所謂「球迷越少，責任越大」嘛！下個月烏普頓公園將會上演熄燈前最後一場，我準備去現場嗌埋一份，雖然對手係球迷最多嘅曼聯，但我哋到時要嗌畀全世界知，邊隊波嘅球迷係最high，high到就快摸到個sky（唔明呀？會歌嚟㗎）！
KEYMAN
節目主持
電郵：mailto:[email protected]