咩叫好嘅公關，香港嗰位白宮發言人不妨學吓德國業餘球隊Deinster SV。話說Deinster陣中有兩位嚟自蘇丹嘅黑人難民（箭嘴示），佢哋前排跟大隊一齊出去慶祝贏波，點知出到去，唔單止俾人用說話種族歧視，返屋企途中仲俾人打，眼都腫晒。Deinster上下極之憤怒，於是喺facebook上載一張全黑人嘅隊相──佢哋將白人球員嘅膚色都改成深色，意指全隊都力撐兩位黑人隊友，對抗種族歧視！雖然Deinster嘅fb專頁得2,000個粉絲左右，但呢個post吸引到近兩萬個like同超過2,000次分享。