上周六澳職聯賽，墨爾本勝利喺頭場作客威靈頓鳳凰，以4:1大勝對手，兼且鎖定躋身季後賽；連埋阿德萊德聯、西悉尼流浪者、墨爾本城、布里斯班獅吼同珀斯光輝，今季季後賽六隊席位亦已經塵埃落定。不過，為勝利先開紀錄嘅前鋒貝利沙，喺上半場領紅被逐，無緣喺常規賽煞科戰候命。季後賽席位確定，但排名就仲有排爭，阿聯喺上周六尾場作客FC悉尼贏2:0，暫時升上榜首，但坐唔坐得穩，就要睇埋獅吼同墨城喺今日兩場波踢成點嘞。