黑皮褸、低浪褲，下巴小鬍子，配襯頭頂小輙頭髮，35歲的盧樂謙，似足街霸遊戲大隻佬，走在路上，雖無過犯，卻是警察查身份證的常客。但原來，鐵漢最柔情：貼錢租舖，讓老師傅承傳手藝；借遊戲，吸引師奶阿叔參與社區重建討論。「以前嘅我，好急躁，唔鍾意解釋」。由會考三分的火爆足球員，銳變為「口水多過茶」的藍屋香港故事館館長。粗獷但心細的街坊館長，是如何煉成的？
記者：呂麗嬋
「個個師傅都係呢句口頭禪：唔銀係咁呀！索性印出嚟，俾啲師傅一人一件」。市井的氣息，總是「銀」來「銀」去。有人嫌粗鄙，在他眼中，卻很親切，還有失傳手藝以外的人情味。「有次經過跑馬地，就講起防空洞嘅生活，都係我哋呢代無法想像的苦難」。掛著「青春工藝」小招牌，這是隱沒在土瓜灣十三街的小舖，也是他與朋友的實驗場。這天，盧樂謙就與83歲的退休木匠龍晚全，一老一少刨木造櫈仔。
「要凝聚街坊，等星期三夜馬，放部電視機喺條街就得，但點樣先可以持續，讓街坊真實參與和討論？」他想到開設「無嘢賣但有嘢學」的社區小店。兩間小舖自負盈虧運作，同樣位處面臨重建的十三街，相距五分鐘腳程。除了龍師傅，還有長駐的花牌紮作人和唱南音的老師傅。各路人馬進進出出，幾近失傳的「徒弟與師父」關係，在小街重生。
鄰舖車房猛男看著好奇，趁一支煙的抖氣時間，捲起衫袖露兩手；路過買完餸的師奶甲，借櫈子小休吹吹水。上月，小街甚至舉行懷舊「街機大賽」，讓經典《街霸》、《泡泡龍》重現社區。「呢個只係起點，會請遊戲商，寫一隻屬於土瓜灣嘅電子遊戲」。面對重建的舊區，即將何去何從？連鎖店總有一間喺左近，是好是壞？盧謂沒有既定答案。「正如喺條街是但搵個位泊車，車主覺得好方便，街坊就認為阻住出入好討厭」。
多角度的想法、讓不同持份者都有機會參與和發聲，真正「有商有量」，是他與友儕心中理想的社區面貌。走進社區，他笑言不是助人，而是自助。「讓我學習到點樣同人溝通。以前嘅我，好急躁，唔鍾意解釋，依家三句話，可以傾足半粒鐘」。父親在懲教署工作、母親是特殊學校校長，生於講究紀律的家庭，年輕時的他，偏偏很散漫。重讀會考仍只得三分，曾幾何時，他是長輩眼中讀書不成的邊緣學生。
「嗰時踢緊預備組，一心做職業球員，點知有次踢波受傷斷腳，返唔到學又踢唔到波」。代表香港出外比賽的足球小將，休養大半年，所屬球會「星島」，未及他狀態回勇已散班。「好憂鬱，關埋自己喺房，悶到喺四幅牆畫畫，只覺得雙手不斷郁，就好快樂」。那時的盧樂謙仍是波牛，隨便拿起家中的木顏色，畫獅子老虎，那想到無心插柳，走進人生另一條跑道。「人生唔同階段，我總會遇到影響我好大嘅人：中學時係讓我踢青年軍嘅教練；到喺白英奇讀設計，就係我嘅老師」。
他最記得，那一年，歐聯決賽是曼聯對拜仁，戲碼強勁。「有朋友叫我出去睇波，我話有份功課趕deadline，唔去嘞，個個朋友都話我轉咗性」。比人遲起步，但這個遲來的春天，卻教他廢寢忘食。畢業後銜接英國大學，會考三分的他，竟以一級榮譽畢業。「喺英國主修插畫，都經歷過迷惘期，唔知返嚟可以做咩」。異國的半工讀生涯，送過外賣、做過搬運，教識他工作無分貴賤；生活其實還有好多可能。
「返香港之後，做過六、七份工，都係無份做得長」。試過為爛尾設計學校開荒、做過短暫插畫師，畫過千篇一律的嫦娥和聖誕老人，又創辦過探討少數族裔文化的「一人社企」，甚至與區議會合作，申請撥款推廣社區藝術。「無之前嘅經驗，故事館未必會請我」。當初以為是見步行步，原來環環緊扣，街坊館長說。