不自殺契約早前在網上引起爭議，有人批評契約冷冰冰，不符人性，有前線輔導人員則解釋，該契約為有效的輔導工具之一。不過當我們在網上熱議時，又有沒有嘗試從求助者的角度出發呢？
記者：梁嘉怡 攝影：陳海威 剪接：梁清偉
從事營銷工作的Philip，工時長，加上人事問題，壓力太大，兩年前捱出中度抑鬱，「發覺個情緒起唔返，覺得一個人做唔到啲咩，好似好無希望，想開心個種感覺就完全無晒。」除了最好的朋友，初時他亦不敢跟別人說自己情況，「因為真係有啲說話會令到我地唔舒服嘅，『喂你諗咁多做乜嘢呢，唔諗咪無事囉』……會用好多方法令你開心，但係佢唔知我哋無能力俾自己開心，可能會播啲好正面嘅歌俾你聽啊，俾啲好正面嘅鼓勵說話俾你聽，呢啲說話某程度上係俾到好大壓力我哋。好單純一個陪伴，其實已經好足夠。」
Philip自言本身喜歡玩，亦頗健談，一向性格樂觀的他，從沒想過自己會患上情緒病，接受不到自己軟弱的一面，當時亦不時萌生自殺念頭，「（有一晚）我想一個人落街行下，但係同時我又好唔想見到識得我嘅人，但係真係咁唔好彩見到啦，然之後有個諗法就覺得，點解搞到自己咁嘅，好唔想用呢個面目去見人……然之後一路行到去海邊，真係想傷害自己。」在生死邊緣掙扎，幸好Philip想起家人，當刻剎停了自殺念頭，亦知道自己需要尋求醫生、輔導員的協助，解決情緒問題。
生死一刻 契約剎停自殺念頭
見過三位臨床心理學家，Philip坦言未必和每一位都可以一拍即合，不過他亦遇到很合得來的一位，令他可以很信賴對方，「（心理學家）會用一啲好引導嘅方式去問你問題，例如我今日覺得呢個同事對我點點點，佢唔會judge（判斷）嘅，佢係會問你點解會咁樣諗呢……等你成個情感抒發出嚟，成個人係會舒服嘅。」對方知道他有輕生念頭，於是和他分析當時為什麼會有這種情緒，待情緒抒發完了，對方才向他提出簽署不自殺契約，「到我情緒再平復返少少嘅時候，佢先再問我其實我哋都有呢個契約喎，不如諗下你會唔會去簽啦……承諾唔去做啲傷害自己嘅事啦，如果我有一刻想傷害自己，我就可以打電話去搵返我嘅輔導員。」
正是這張契約，拯救了他的生命。有一次他與同事發生爭執，刺激到他情緒失控，再次走到海邊想了結生命，「真係想跳嘅時候，就真係諗返起份不自殺契約……你係應承咗人唔傷害自己架喎……我知道嗰一刻我要打電話，打俾當時嘅服務機構，解決咗當刻嘅情緒波幅。」
雙方關係才是成效關鍵
雖然契約曾救回Philip，不過契約的成效仍具爭議，有外國研究亦質疑契約並不是有效防止自殺的工具。記者接觸過另一位不願透露姓名的情緒病患者，他也曾經簽署契約，但對契約的看法卻明顯跟Philip有分別。據他憶述，當時輔導員知道他有輕生念頭，但未有太了解他內心的想法，便提出簽約要求，希望他能自我提醒，不要傷害自己；他坦言，要背負承諾反而令他覺得有更大壓力及無助。
臨床心理學家葉劍青表示，契約該在輔導員及求助者建立互信關係後才使用，作用是協助鞏固求助者對抗死亡的信念。若然未建立好關係便被要求簽約，會令求助者感覺對方是權威，令他感到有壓力，契約亦未必有效果，甚至會破壞雙方關係。
也許，真正救到人的並非一紙文件，而是背後人與人之間的互信關係。