阿積士教練法蘭迪保亞真係敬業樂業！呢位已經45歲嘅荷蘭名宿，前排踢波嗰陣整傷咗右腳腳跟嘅阿基里斯腱。班球員可能諗住迪保亞留喺屋企養傷，到時就冇王管，點知迪保亞着住保護鞋，一早就坐喺架高爾夫球車度，喺訓練場等緊班球員。雖然佢冇得落場親自指點，但相信每個阿積士球員都感受得到，背脊有對眼望到實，真係想偷吓懶都唔得。阿積士今日會喺荷甲主場對施禾利。