文家良馬房之5歲馬「歡樂小子」近兩季獲3冠4亞5季，實力好強勁，而且正值大熟大勇，但隻馬上仗於上月23日，卻搞出個大頭佛，配主帥巫斯義喺谷草一哩，末段於外疊如狼似虎撲上，看去勢本應坐二望一穩勝，但最後幾步發生奇事，隻馬終點前忽然亂晒步韻，連番跳步，嚴重失去平衡，結果連位置都撻埋只得梗頸四，馬迷睇到眼都突埋！
由於「歡樂小子」唔係第一次有咁嘅情況，賽後馬會話唔會批准佢報名參加任何夜賽，仲進一步裁定唔准由見習騎師操刀。並教埋文家良，應除去「歡樂小子」的鼻箍，因為隻馬近兩仗戴此裝備均有問題，搞到文家良冇晒癮。
既然馬會開到口，文家良亦唯有做嘢，這天安排「歡樂小子」初配雷神莫雷拉，除去鼻箍試第七組1000米快活谷閘，結果隻馬好規矩，沿途三四位，直路大步追趕姿態輕鬆勝出，再冇跳躍避影子亂晒步韻情況，「金碧輝煌」、「萬事盛」則跑二、三名。
「歡樂小子」咁心急安排換雷神試閘，無非希望盡快取得及格，部署短期內報名再戰，唔想浪費其勇態，呢匹馬贏過沙田1400米，冇得跑夜賽，都唔係世界末日嘅！