今年金像獎一大焦點當然落係「最佳電影」，事關單單係涉及政治議題嘅《十年》入圍，已經令內地嘅騰訊同央視禁播頒獎禮。至於《十年》會唔會因為太敏感影響攞最佳電影機會？好似導演黃修平話齋：「我哋做創作人，唔好將我哋咁政治化，真係考慮套戲好定唔好架咋！」OK！以戲論戲，《十年》真係有好多勁敵－刻劃人性陰暗面嘅《踏血尋梅》、破舊立新嘅《智取威虎山》、睇到大家眼濕濕嘅《五個小孩的校長》．．．．．．《十年》要爭最佳電影真係唔易！聽吓電影人點講？
張家輝：《十年》我冇睇過，入圍嘅五齣電影我都冇睇過，好難評論。
陳心遙：《十年》的而且確引起好多香港人共鳴，佢拎最佳電影，我唔會感到意外。
杜汶澤：夠膽就上嚟攞，應該夠膽，拍都夠膽啦！
翁子光：係有機會，《十年》正正令大家看到，原來未必有咁多人有勇氣去拍呢類電影。
顏卓靈：呢個我自己有少少偏心，我希望係《十年》。
