新亞校友李明逵與范徐麗泰、梁愛詩、曾德成等人成立一個「勵進教育中心」，主旨在鼓勵、推動中國歷史教育，培養中學生修習中國歷史，方法有提供大學主修歷史學獎學金，舉辦內地交流學習團，協助學生提升中史考試技巧等等。
李明逵係新亞書院歷史系畢業生，師承已故孫國棟先生，即錢穆先生嘅徒孫，對推動推廣中國歷史教育，當然義不容辭。李明逵在1972年畢業，在學四年時，新亞歷史系大師雲集：有牟潤孫、全漢昇、嚴耕望、王德昭、陳荊和等等名揚四海人物，如此教師陣容，今天已難復睹。李明逵飽受名師薰陶，畢業四十四年後為中國歷史教育盡一分力，大有道理。
可惜嘅係，客觀情況已今非昔比。讀大學，只有中文大學歷史系係一個大系，嶺南大學歷史系可以維持得到，其他大學歷史系只係見步行步，培養不少著名政府高官嘅香港大學歷史系已今非昔比，人丁單薄；在中學，選修中史嘅高中生日少，今年考DSE中史科嘅，頂多係八千零人，連出版中史教科書嘅書商都大嘆蝕本冇市場，難以經營。在此環境下，「勵進教育中心」憑乜本錢去推動中國歷史？想來係吃力不討好嘅工作，一個不小心，就淪為「內地交流洗腦活動」！更有甚者，「勵進」聲言不推廣近代史教育，初中只教至1911年民國成立為止，咁就唔會滿足學生需要咯。
左丁山中學年代，港英政府為免觸及國共鬥爭，中國歷史以1911年為截止年份。嗰陣時正所謂「去古未遠」，教少五六十年歷史，還勉強說得通；當時仲有好多歷史見證人講古仔呢（譬如左丁山姨丈就係流亡在石硤尾之國民黨軍官），但現在已經係2016咯噃，整整一百年歷史唔講唔教，點講得通呀？「勵進教育中心」因梁愛詩、范徐麗泰、曾德成關係有其苦衷，但當今互聯網盛行，學生上網容易到極，百度一下，谷歌一次，已可搵到大量正史野史資料，有心人不如索性導學生於正軌，教埋近百年史啦。唉，講到呢層，就有國共之爭，台灣版歷史書與大陸版史書常有差別，大陸版歷史更大量滲透馬克斯史觀，如要教書，你話教邊本？讀大學就話博覽群書箒，中學生讀中史，只會讀一本教科書及考試雞精書，幾容易受誤導㗎。