力爭東岸季後賽尾班車嘅公牛，周四以103:100擊敗火箭，加上競爭對手溜馬同日輸波，要晉身季後賽仲有希望㗎。不過，美國傳媒就大爆公牛想換走主將占美畢拿（Jimmy Butler），但喺另一主力戴歷路斯（Derrick Rose）持續傷吓傷吓咁，呢單應該都係愚人節嘅料，得啖笑咁啦！
公牛今場真係贏得相當驚險，因為兩軍喺上半場仲係以52:52打成平手；不過上半場已經射入21分嘅後備兵米諾迪（Nikola Mirotic）繼續有好表現，而且畢拿喺下半場狂轟15分，幫公牛將戰績改寫至38勝37負，暫列東岸第九。教練凱保（Fred Hoiberg）賽後都忍唔住大讚球隊：「全隊人為咗贏波真係付出咗好多，希望我哋可以保持呢種表現。」
路斯打11分鐘又傷出
對於今場只係打咗11分鐘就因為左手踭受傷離場嘅路斯，凱保就話係自己做錯決定，令呢位控衞帶傷上陣。路斯就希望可以盡快歸隊：「我之前照過X光，但搵唔出邊度有問題，但會盡快接受磁力共振檢查。」公牛攞到兩連勝自然開心，但唔知美國傳媒係咪諗住趁愚人節整蠱吓佢哋，日前竟然傳出將會換走畢拿嘅消息；不過呢位今場攻入21分嘅後衞就向球迷大派定心丸：「芝加哥係我最愛嘅城市，我唔會離隊。我唔會理呢啲傳言，我只係想盡力為球隊贏波。」
周六迎活塞成關鍵戰
溜馬喺同日另一場，主場以94:114輸畀魔術，雖然仍然以39勝36負保住第八，不過同公牛嘅差距越縮越窄。公牛要搭上季後賽尾班車，都要問過活塞先得，因為活塞暫列第七，周六背靠背作客公牛將會係影響東岸下游嘅排名大戰。（now678台明日8:00am直播）希望表現咁好嘅公牛唔會俾畢拿離隊嘅謠言影響啦！
至於火箭不敵公牛之後，就以37勝39負跌落西岸第九位。攻入24分嘅夏登（James Harden）都難掩失望：「我哋喺第三節仲有九分優勢，最後反輸真係令人好沮喪。球隊表現好飄忽，要盡快搵辦法解決。」