近排成績麻麻嘅港超聯一哥東方，噚日朝就喺佢哋fb宣佈，巴黎聖日耳門（PSG）球星伊巴謙莫域今個夏天約滿加盟嘅消息；由於內容講到似層層，如果唔記得噚日係愚人節，真係分分鐘中招。雖然係流料，但就引到唔少球迷回應，有人話不如再吹大啲啦，亦有人話無聊喎。至於同東方爭緊聯賽冠軍嘅傑志，佢哋公關部就即刻喺球會fb，上載咗伊巴喺2014年隨PSG嚟港同佢哋踢友賽嘅相回應，仲寫住話係「#真伊巴」，呢記抽水，又確實係抽得好應。
傑志公關部噚日除咗貼文回應東方有伊巴「加盟」，亦有出post通知球迷，佢哋今日五點半會喺旺角場迎戰灝天黃大仙踢港超。為咗吸引多啲球迷入場，仲會推出優惠，藍浪會員憑證就享有門票買一送一，而傑志足球學院學員同學生證，仲可以免費換兩張飛。
傑志今迎黃大仙
港超排第二嘅傑志上場喺聯賽盃準決賽以6:1狂數東方，今日乘勝對黃大仙。教練朱志光賽前話，球隊爭聯賽未斷氣，首先就要喺今場贏波，再睇東方嚟緊幾場會唔會再失分；而中場鐵人黃洋就話本來預咗冇得鬥，點知又有數計喎，所以肯定要搏埋佢。另外，兩連勝嘅冠忠南區兩點半迎戰包尾嘅標準流浪，教練鄭兆聰話迪亞斯等主力停賽，惟有盡力踢啦。