復星（656）向來派場十足，每年舉行業績會都搞場大龍鳳，怕芬佬、分析員唔知間公司做緊乜，噚日就搵來一位靚靚外籍模特兒，一身天使打扮甚有「仙氣」，隔籬仲有兩名肌肉男扮武士揸住把巨劍做護法，喺現場十分搶眼。
唔好誤會呢幾位模特兒，扮手機遊戲人物，實情係代表緊復星一個重要項目。話說集團喺海南島三亞同國際酒店集團合作，準備投資成過百億人仔，起個「亞特蘭蒂斯」綜合度假酒店，入面有水族館，又有水上樂園，總之包羅萬有，係要配合復星嘅氣派喇。
之不過，亞特蘭蒂斯其中一個傳說，係話因為天災人禍，搞到沉沒海底，用呢個做主題唔係唔得，但好似怪怪哋囉。