最近政壇盛傳梁特為咗連任，趁春天將盡，寒意漸消之後，開放「暖氣」，搞搞懷柔咁話。呢啲「放風」唔知真定假，但睇睇陳婉嫻「被退休」，又覺得唔多似噃。陳婉嫻成日忘記了自己係工聯會會員，正是趙孟能貴之，趙孟能賤之，佢掛住向梁振英追數吖嗱，又夠膽批評梁「剛愎自用」，卒之得罪了貴人，工聯會大佬鄭耀棠公開講陳婉嫻只係發表個人意見，不代表工聯會立場，又明言「嫻姐會退休」，咁講法，陳婉嫻執定包袱都得咯。工商界就高興呀，以後在立法會逼迫張建宗交代標準工時，強積金對沖及退休保障，即時少咗一把「討厭的聲音」，由李卓人（工黨）去講喎，梁特更加睬你都嘥氣啦。
一位對工聯會有消息嘅人士就講陳婉嫻近年恃老賣老，又係票后，對工聯會現時領導人唔夠尊重，而且工聯會民建聯驚住老人家難敵泛民激進派嘅新血，有意換班，故此要陳婉嫻、葉國謙等人退下來，不過老葉聽話姓黨，故此升上行政會議，夠膽批評梁特嘅陳婉嫻以後就做局外人算了。
俾葉國謙代替之李慧琼居然被視為「特首候選人」之一，實在笑話，橫睇掂睇，李女士都未夠班喎，佢有何政績呀？有幾多民意支持呀？對西環及中央有幾多貢獻呀？工商界識佢係邊個呀？普羅大眾對佢有feel咩？全部答案都會係no way！呢位曾鈺成徒弟接受電台訪問，開出下任特首四大執政條件：（一）市民支持及中央認同；（二）能團結建制派及與議會各派別溝通；（三）能處理香港深層次矛盾；（四）有團隊配合落實政綱。
此四大條件，梁振英全部不適用，因為梁特（一）無民意支持，（二）無法團結各陣營及溝通，（三）無法處理深層次矛盾，（四）無團隊配合。咁講法即係民建聯向梁特開出條件，如要連任爭取民建聯支持，唔該改變做人做事嘅方法，至於梁特是否聽得入耳，係另一個問題。李慧琼在行政會議近四年，對梁特作風應知之甚詳，啱啱退出行會啫，就開出梁特無法子做到嘅四大條件，究竟係乜嘢意思，唔通開完政協人大兩會之後北京又試引蛇出洞，然後一網成擒？有志之士，都係小心說話好啲，唔怪得大人物如李兆基、呂志和被問及特首連任，都小心翼翼唔表示支持或反對，建制派還在猜測習大大究竟想點呀！