沈嘉偉旗下I.T（999）一向只得佢與胞弟沈健偉做執行董事，公司噚日忽然宣佈加多一名執董，升咗負責中國業務嘅陳惠軍做執董兼I.T中國首席執行官，似係有意加強拓展內地業務。
睇番I.T年報，公司2015年度喺內地有超過400間店，香港大約270間，家陣講緊中港兩地嘅零售市道都差，搵人睇實內地生意都啱數嘅。
45歲嘅陳惠軍讀會計出身，早於2006年加入I.T，負責中國業務營運；I.T與法國百貨巨頭巴黎老佛爺合資喺北京開嘅旗艦店2013開張，陳惠軍亦都係呢間合資企業嘅董事。升職後，陳惠軍年薪430萬元，另有花紅。
不過講到請人，沈嘉偉唔知搵到掌櫃未呢。佢今年1月請咗內房股綠城中國（3900）前首席財務官林戰，點知對方未夠三個月就走人，去咗安踏（2020），佢係咪應該搵咗人管數先呢？