窮途末路的亞視今日熄機，從此成為歷史！亞視舊將、曾合作《今日睇真D》的舊拍檔歐錦棠和林建明（沙姐）為《蘋果動新聞》拍愚人節特備節目，兩人痛心亞視走到絕路，阿棠狠插娘家遇人不淑，最後被市民唾棄，沙姐慨嘆：「有佢有我，𠵱家佢冇咗，我又仲喺度！」
撰文：魯吉
日前《蘋果動新聞》邀請亞視舊將歐錦棠和林建明（沙姐），到將軍澳蘋果大樓拍攝愚人節特備節目，今日在動新聞播出。於亞視出身的歐錦棠感觸說：「呢兩年睇住亞視跌落懸崖，之前真係冇感覺，甚至乎你收咗檔，唔好煩，唔好喺度獻世！不過，最近呢兩個月政府要收佢個牌，我就有少少依依不捨感覺，惋惜服務香港半個世紀嘅傳媒機構落得如此收場！」
阿棠為此搖頭嘆息：「唔係佢做得唔好，係遇人不淑，落喺一班唔識做傳播、一班生意佬，為咗一己私慾，甚至呢個政府，我唔知佢為乜，冇人解答到，但就係咁啦，你睇到呢啲咁嘅狀況，你唔發牌畀其他機構，由得呢個機構一路任意妄為，做一啲偏行己路節目，令到市民唾棄佢，好哋哋一個資源咁豐富嘅機構，就咁冇咗，我好嬲。」
沙姐：快啲完咗再嚟過
雖然離開多年，但阿棠仍記得昔日亞視的人情味：「個個同你死掂佢，同做人一樣之嘛，爭啖氣，做亞視咁多年，你惟有忍住眼淚吞住啖氣做150%畀佢，咁先至有人睇你，形成我哋死唔肯認輸嗰種脾氣。」
而沙姐跟阿棠已20多年沒合作，她說：「好奇怪！自從《今日睇真D》真係冇合作，碰面都好少，今次為呢件事同佢一齊做嘢，覺得佢外形成熟咗，情緒好似穩定啲，以前佢做嘢好大壓力，嗰時佢情緒波動㗎，有時都火爆㗎。」
問到亞視熄機會否不捨？沙姐說：「我嘅思維同性格係一味向前看，寧願佢快啲完咗去再嚟過！老實講，我入行都係喺麗的電視，但命運係好神奇，我離開呢行亦都因為喺亞洲電視，俾佈景板扑穿個頭，逼住冇辦法再做，我喺度，有佢又有我，有我又有佢，𠵱家冇咗佢，我又仲喺度！」