4月1日亞視停播之後，點先睇到新電視台？
今次動新聞請來識少少廣東話嘅香格拉為大家介紹冇咗亞視後有乜嘢睇。原來香格拉喺瑞士讀書時，因為經常睇港產片及港劇，加上有高人指路，所以聽／講簡單廣東話都難唔到佢。唔知佢又有無追睇新電視台嘅節目呢？
方法有兩種：
數碼新台：Viu TV
如果閣下正在收睇數碼電視（即是翡翠台台徽有HD）或使用數碼機頂盒，4月2日開始就可以利用「重新搜尋頻道」功能重新搜台，就會出現試播中嘅99台Viu TV（4月6日起正式開台），及現已啟播嘅港台31、32及33台。原本亞視多個頻道就會消失。
觀眾可按電視／數碼機頂盒遙控器上嘅「Menu」進入「頻道設定」，選擇「自動搜尋頻道」功能，完成搜尋後，便可在99台收睇Viu TV。
有哪些節目選擇？
包括網上瘋傳嘅真人騷《跟住矛盾去旅行》，長毛vs曾鈺成、林日曦vs蔣麗芸，網民都熱切期待，呢幾對充滿矛盾嘅組合；由網絡小說改編《瑪嘉烈與大衛》，網上版有曾美華加柳俊江，電視版更有林保怡加周家怡，加上熱播韓劇《太陽的後裔》。
模擬電視，沒有亞視嘅日子：
至於模擬電視（即是大牛龜電視那些），4月2日起原來嘅亞視本港台就會變成港台31A台、亞視國際台就會變成港台33A台（A代表模擬制式 analogue）。31A台會同數碼台嘅31台同步，以廣東話廣播，由細睇到大嘅《教育電視》系列、帶領網民話題嘅《警訊》、女神美琪BB嘅《辦公室生存之道》、紀錄片《風雨夜歸人》等等，都是紀錄片愛好者首選。
33A台就會跟數碼台嘅33台同步，以英語轉播CCTV9。有一點需要注意嘅係，模擬電視係睇唔到Viu TV99台嘅。如果你係全港嘅1%觀眾，沒有數碼電波覆蓋，你可以利用手機應用程式或登上 viu.tv 網頁收睇電視直播或節目點播。
全新免費電視以外嘅選擇：
新電視台都不能滿足你嘅話，你可以試試Netflex，每月63元起，任睇荷里活電影同埋美劇。可以喺智能電視（iDTV）、Apple TV 、Android TV、Playstation 、Xbox 、手機或電腦下載程式及登記即可，首月免費收睇。
美劇《紙牌屋》（House of Cards）、《夜魔俠》（DaredDevil）、《勁爆女子監獄》（Orange is the New Black）、《法網危情》（How to Get Away with Murder）、《葛咸城》（Gotham），加上睇唔晒嘅電影，我真係可以好宅。
仲有VIU「煲劇」程式免費收睇日韓劇集，以及半年免費收睇英超嘅樂視可供選擇（須購買及使用樂視手機、電視盒子或電視機收睇，並支付基本月費）。電視大戰，一觸即發！
