林峯四月尾開三場紅館演唱會，喺開騷前慣例出一隻EP，推一首主打歌，嗱！隻EP《Trap》出咗一個禮拜左右官方公佈話已經賣到白金張，即係30,000張咁上下。昨日阿峯就喺尖東搞祝捷，順便公告演唱會詳情。記者會開始，阿峯一出場即刻又唱又跳新歌《Heart Attack》，非常落力。為咗演唱會林峯瘦咗一圈，塊面無哂肉，睇落去個鼻又高咗，但係阿峯仲覺得唔夠瘦，家陣每日食白烚雞肉同蛋白，飲清水，目的係為咗著衫靚，仲有一個月，如果未達標佢可能要絕食先得。