這晚谷草頭馬有一大特色，就係末段從內欄竄上一攻而破，第一、二場排1、3檔勝出的「得意財星」及「勁駿皇駒」都係咁樣，第三場「好運有利」都係抽內檔，不過直路就抄出外叠後發先至。
到第四場四班1800米，雷神夥拍灰馬呂健威馬房之「有智者」1檔起步，沿途貼欄一步不蝕，直路順勢沿欄直上，輕取於外欄一度突圍的「超順暢」，馬兒完成今季三捷，俱於谷草1800米取勝，單Win及組合獨贏A1，分別派38.5及25元，雷神一手一腳憑一對7號馬沈廐「好運有利」、呂廐「有智者」囊括第三口孖寶。
而與張智霖、劉心悠合作拍FANCL廣告近日播映出街的「至索主播」無綫前新聞小花蔡雪瑩，這晚與男友朱威霖（William）有份為「有智者」拉頭馬。
今場「超順暢」臨場畀落飛黨狙擊，着綠燈7倍開跑，跑第二延續季內在韋達胯下例入前五名，但就仲未出到頭。大熱「愛美麗」負133頂磅初跑谷草於1800米均速前領，直路力弱捱番一席季軍返嚟，第四名則由冷馬「勝利仔」夥拍蘇狄雄後上取得，四重彩派6,736元。
呂健威指「有智者」與莫雷拉特別合拍，加上排一檔有利，谷草1800米最合適，集有利條件於一身，馬兒加分後留在四班跑谷草1800米，仍具競爭力。