【科健籽：運動人生】
ViuTV下周四會首播全港首個全女班MMA格鬥真人騷《G-1格鬥會》，有八位女藝人同運動員參與。近年香港有唔少靚女玩MMA，包括健身教練、OL、空姐同模特兒，有人為健康，有人為挑戰自我，聚首鐵籠使出看家本領，無懼破相霸氣埋牙較量，原來女人都可以毫不錫身，拳拳當真。
MMA全名是Mixed Martial Arts，中譯「綜合格鬥技」，是一種可以運用任何格鬥武術的搏擊運動，例如巴西柔術、拳擊、泰拳、空手道等。「Spark fight & fitness」發展總監Ross說：「好多時啲人會問我MMA係咪即係摔角或WWE（世界摔角娛樂），會用摺凳打人，其實要解釋乜嘢係MMA，不如睇張家輝套《激戰》喇，咁樣會清楚啲。」MMA大約五年前引入香港，最近兩年多了女人參加，但見她們與教練一對一，表情嚴肅，全神貫注向教練出招，出拳速度快，踢腿力量狠，教練也得專心接招，霸氣盡露。每完成一個好的攻擊會會心微笑，從眼神可看到她們樂在其中。到底MMA有甚麼吸引？Ross說：「𠵱家香港好多OL本身都玩開泰拳或拳擊，想突破自己就會嘗試MMA，其次MMA要用好多關節技，關節技係好好嘅防狼術。」
中巴雞手鴨腳 痠痛繼續打
做模特兒很靠樣貌，萬一揩花臉頰怎麼辦？中國巴西混血模特兒鄺敏慧（Elizabete，暱稱中巴）說：「玩得就唔諗得咁多，我唔係好擔心呢方面。」她自小在治安不佳的巴西長大，於是細細個就跟哥哥一齊學巴西柔術。她來港做模特兒後，雖然有持續做瑜伽，但最近有感生活不太健康，「做model唔會朝九晚五返工，工時唔定，有時有好多空餘時間，都算係過住幾唔正常生活，心諗不如做多啲運動協調番生活。」數月前，她開始跟隨哥哥玩MMA，一開始難免雞手鴨腳，「起初連踢腿都好難做到，第二日成身超痠痛，我想當係一個目標挑戰，睇吓自己水準可以去到邊。」
空姐踢腿嘭嘭聲 增加應變力
Christine是空姐，別看她身形嬌小，其實好打得，尤其踢腿勁到嘭嘭聲。讀書時，她覺得女仔都可以保護到自己，於是學跆拳道，一學六、七年，踢腿自然有番咁上下。去年經朋友接觸到MMA，一試傾心，「當玩開一項武術時，自然會對其他武術有興趣。」做空姐形象斯文，她亦承認，當同事知道佢玩MMA時都很驚訝，「佢哋會話：『你講真㗎？』、『你黐線㗎，萬一打到塊面點返工？』」對，真的會隨時打到變豬頭，不過她懶理，就算空姐要周圍飛，她每周都堅持抽時間訓練，試過被對手刮傷臉頰，翌日化妝遮一遮傷口如常上班，「每項格鬥運動都有受傷風險，其實我都驚整傷塊面，但玩得格鬥就預咗。」她認為MMA着重即時閃避攻擊與反擊，有助訓練即時反應，有助增加她工作上的應變能力，更有能力抗壓。
傷「椎」人 變健身教練
當了三年健身教練的Stephanie之前她為事業拼搏，休息不足加上坐姿長期不正確，結果傷及坐骨神經，一度連走路也困難。後來千金散盡，花長時間做物理治療醫好傷患，自此正視健康。數年來努力健身，她在健美比賽中得獎，還考獲健身教練牌，之後索性轉行。為更上一層樓，提高身體協調與靈敏度，她無懼傷及舊患，跟朋友試玩MMA，「做好多嘢都有機會受傷，但受傷後只會更加強壯，我覺得只要承受到呢個痛，就可以鍛煉到堅毅精神。」未來她會繼續鑽研MMA的格鬥技，不排除有朝一日嘗試參賽。
MMA 規則與招式
前空手道港隊代表、Spark fight & fitness主教練林毅謙（Henson）解釋，MMA打三回合，每回合五分鐘（初學者每回合三分鐘)，每回合之間有一分鐘休息，有評分制度，以擊敗（KO）或令對手投降為勝。比賽近乎冇規則，任由選手自由搏擊，但不准踢下陰、打後腦、牙咬和扯頭髮等等，擊倒對手後，裁判不會數十秒，會判定選手是否無法再戰或有傷亡危險，有權馬上終結比賽。招式方面，MMA分「立技」和「寢技」。 立技即站立格鬥技，如拳擊、空手道和跆拳道等；寢技有「摔」和「撻」等關節技和絞技，令對手落地投降，包括巴西柔術、柔道和俄羅斯摔跤。
MMA起源 「乜都得」格鬥
在巴西長大、贏過兩年巴西全國柔術冠軍的Ross解釋，MMA源自1920年代初巴西的「Vale Tudo」格鬥競技，「Vale Tudo」是葡文，意指「乜都得」，亦即冇限制，「競技原意係比拼邊項武術強，例如巴西柔術同空手道會喺有乜規則情況下對打，當時仲未開始用拳套。」Vale Tudo比賽主力搞手是巴西柔術始創者Gracie家族，將巴西柔術融入比賽。隨着發展，這格鬥競技開始有規則與拳套等裝備，到1990年代，Gracie家族成員將之推廣到美國發揚光大，逐漸成為一項運動比賽並改稱MMA，成為美國終極格鬥錦標賽（UFC），UFC亦成為目前全球最大的MMA賽事。
三大裝備
Spark fight & fitness
http://www.sparkfightfitness.com
記者：余 瑋
攝影：林栢鈞
編輯：陳漢榮
美術：楊永昌