噚日係林建岳首任旅發局主席嘅last day，之但係今日就係佢新一屆冧莊做主席嘅任期開始！三年又三年，呢三年最大挑戰，莫過於點樣重振低迷旅遊業嘅雄風，岳少當然都要度吓橋，最新就情商港人like爆嘅財爺曾俊華粉墨登場，喺短片中展現最擅長嘅劍擊，兼且發揮搞gag本色，推銷香江特色。
呢條即將喺本月中播出嘅政府宣傳短片，主題叫做「香港本色」（We Make The Difference），除咗有鬍鬚曾，亦有另一鬍鬚佬林子祥義助（阿Lam係男拔舊生），重新演繹旅發局主題曲。鬍鬚曾片中喺母校喇沙同師弟比劍，展現香港活力。其間有人問佢「剃唔剃鬚」？佢就回應「睇騷就會」，力銷香港嘅騷正，又話「區區有surprise」，好瞓身！
唔搵CY？岳少︰財爺管旅遊
嗱，話八方多疑都要講，咦咦咦，香港最高領導人係CY梁振英喎，旅發局sell香港卻搵鬚鬚曾上陣，點解嘅？岳少解畫，指財爺管旅遊吖嘛，又係撥錢嗰位，咪搵佢囉，據聞鬍鬚曾拍攝時冇乜NG。八方睇過短片，都幾重點推介本土旅遊特色，本土喎，點解唔搵CY亦毋須多解釋！
原來岳少現時係最資深嘅旅發局成員，皆因任主席前做過兩屆、共6年委員，加埋呢3年主席生涯，已經畀咗9年青春旅發局。佢慶幸𠵱家嘅同事非常幫忙，但都忍唔住呻，話未試過做一份工，無論人多定人少（客源），都會俾人鬧囉！當然啦，越難越要做！旅發局話本年度會投放5.5億作市場推廣，其中2.22億係額外撥款，當中嘅9,530萬重點用嚟重塑本港旅遊形象，8,400萬用嚟製作宣傳香港嘅短片（但唔係財爺呢條片），當然包括埋海外播放費！
李八方
mailto:[email protected]