牽牛外遊，呢兩星期由何西頂上，各位讀者冇牛腩食，食住西式咖喱先。國際賽告一段落，各大歐洲聯賽喺周末又開番波；西甲國家打吡巴塞隆拿對皇家馬德里，你話係矚目大戰又得，無關痛癢亦可，巴塞𠵱家領先緊死對頭皇馬成10分，就算輸畀你，個聯賽錦標都仲係咁穩陣。不過，起碼皇馬主帥施丹（圖）唔會咁諗，可以喺魯營贏到巴塞，省靚自己個招牌。
效力同執教過巴塞隆拿嘅名宿告魯夫，喺上星期與世長辭。各界對呢位球場上嘅天才推崇備至，話係佢帶領巴塞隆拿走向一個成功嘅新世代；告魯夫由1988至96年做巴塞隆拿教練，贏咗四次西甲冠軍，更有意義係歷史性第一次贏歐冠盃。巴塞歷來贏過23次西甲錦標，頭10次係喺1929到85年，超過50年先贏到；但自從告魯夫嚟執教之後，近廿幾年已經贏咗13次，睇怕今季會加多一次。
告魯夫做球員定教練都咁威水，相信施丹都好想好似佢咁。施丹做球員嗰陣都被譽為球王，仲贏過告魯夫失諸交臂嘅世界盃冠軍，退役後幾年已經做皇馬主帥。不過皇馬一向換教練當食生菜，曾經聽講皇馬寧願要個贏唔到西甲但贏到巴塞嘅教練，都唔要輸國家打吡但贏西甲嘅主帥；係咪真就好難證實，不過施丹要喺下季繼續做皇馬教練，如果周六可以喺魯營贏到巴塞，都算係幾有份量嘅籌碼。
講開球會對教練冇耐性，皇馬固然係，由告魯夫喺96年離開巴塞開始計，皇馬已經出現過19次教練變動；不過巴塞近20年都曾經由10個唔同教練執教過，13/14球季嘅馬天奴，贏得個西班牙超級盃，冇成績一樣要執包袱。
文：何西