愚人節新常態是介乎忍唔住笑，與唔講得笑之間。
葉劉和梁狼聽到特朗普大講美國人優先，對白熟口熟面，呸！美國不就正是本土派的幕後黑手！明明影到梁天琦跟美國領事在金鐘Cova歎咖啡密會！外國勢力，真係見到！特朗普上台，香港仔以為篤過魚蛋，可以免簽證？葉劉眨住眼扮笑：等我做咗特首，實得！
你想機場，超乎想像。講緊N咁多億，無人識笑。三跑出事，邊個負責？三跑行高鐵這條舊路，遲早爆大鑊。佔領三跑，不是發夢！受空域所限，三跑飛唔起，塊地做硬全球最貴呎價的墟市，美食車唔驚無位泊，洗頭艇都有月租泊位。年青人露營唔使去貝澳或者迫入長洲。三跑，其實係阿爺安排跑馬仔，初賽無放飛機，會有四個茂李落場。除非裸跑，邊個笑得出？
三，上海迪士尼新屎坑，門券炒賣一空。本報調查過，上迪比香港大兩倍，入閘後園區內僅得15個廁所，熟手鏟蝦、搶荔枝、踢櫻花樹的強國人，點夠解決？條氣唔順的吳克儉響應一帶一路遊園，放心落車，但廁所人龍比春運更長，唔講得笑，何患無廁？一褲都係！