蘇保羅旗下本周四(31日)第二場五班1200米嘅「蜜圈」，跑咗25場得5亞4季而未勝，雖然質素好普通，但蘇保羅話點都想為佢打破齋砵，仲話做練馬師要訓練出頂級良駒固然唔易，但要幫「蜜圈」呢類老牌處女馬取得零的突破，就更具挑戰性。
「蜜圈」上場配羅理雅喺同程殺入亞軍，發揮相當好，但今場就飛起羅理雅，起用蔣嘉琦，蘇保羅說：「我都係貪嘉琦有10磅減，家陣隻馬只負121磅，冇咁辛苦，而且嘉琦季初騎過『蜜圈』出戰四班直路賽跑到第四名唔錯，人馬好合拍，踏入季尾有磅減一向好着數，所以換人試試囉。」
其實羅理雅同嘉琦唔知係咪撈亂骨頭，成日都「擦出火花」，本月9日羅理雅策「勇駒」最後一個彎狂撞嘉琦嘅「大運舞台」，羅理雅因此要停賽三期。到本周一賽事嘉琦「復仇」，所贏嘅「執子之手」，正係頸位力挫羅理雅座騎「勁風」。而今期夜馬又搶走羅理雅之「蜜圈」，搞到佢呢場坐冷板，唔通佢哋真係有你冇我？