1974年世界盃在西德舉行，那一年，左丁山第一次從電視轉播看世界盃，以告魯夫為首嘅荷蘭隊第一次在全世界觀眾面前演出荷蘭全能足球，對告魯夫驚為天人。嗰陣時世界上冇互聯網，冇家庭電腦，一切足球評述靠睇球評家之生花妙筆，告魯夫雖然已經帶領阿積士連續三年（1971至1973）贏得歐洲球會盃（今天歐聯），世界球迷仍然對佢嘅球技所知有限。及至1974世界盃，大家在電視睇到，當堂嘩嘩聲，到咗決賽日，西德對荷蘭，幾乎全香港都擁荷蘭隊，認為告魯夫捧盃係眾望所歸，點知西德足球能人所不能，繼1954年爆冷門擊敗大熱門匈牙利，令球王潑斯卡斯及匈牙利足球永遠遺憾之後，74年又憑碧根鮑華呢位超一流清道伕踢出堅壁清野防守戰術，令開波唔夠一分鐘就輸一球十二碼嘅西德隊之後守土不讓，封殺荷蘭全場壓迫進攻主義，憑兩次機會就以二比一取勝，贏得冠軍。此後告魯夫再無參加世界盃。
十八個月前，英國衞報訪問告魯夫，重談1974往事，告魯夫淡然處之，對記者講：「雖然輸咗，世人記得我地多過記得贏波嗰隊。」3月24日，告魯夫因肺癌逝世，佢一生愛吸煙不離手，至死不悔，只得68歲命，今天嚟講，未免死得年青一點。昨日左丁山講及打波有激情，有實用兩派，爭奪冠軍往往係實用主義佔着數，例如NBA馬刺隊，英超摩連奴，世界足球德國等。在中環做人，要在金融法律地產界出人頭地，已經要夠晒現實、實用、理性、冷靜，想睇場波發洩下，都要現實理性？幾悶死人，好彩告魯夫夠偉大，偉大不在於佢生前球技驚人（叻唔過比利、馬納當拿與美斯、C朗），而在乎佢對足球之貢獻，創下Tiki-taka（即西班牙與巴塞戰術）球風，在巴塞着重青訓，從而培訓出沙維、恩尼斯達、費比加斯、美斯等球星及已成為權威教練嘅卡迪奧拿。卡迪奧拿充份繼承師傅真傳，將巴塞帶上巔峰，將拜仁慕尼黑成為德甲霸王，成為全世界足球學習對象。比利係認真好波，但佢對世界足球嘅長遠影響力，遠遠不及告魯夫，馬納當拿更係壞榜樣。告魯夫個人失意於世界盃，但成功將足球戰術與藝術，集體攻防與個人自由（美斯為表表者）融為一體，當今巴塞之美斯、尼馬、蘇亞魯斯三人合力，將告魯夫足球推上阿仙奴領隊雲格所講：It is an art。告魯夫在足球圈永垂不朽！