大公司被網民惡搞已經唔係新事物，最近中招嘅係國泰航空（293）。一名叫「王力奇」嘅YouTuber早前上載一條約長兩分鐘嘅電影預告片，入面間航空公司叫「咖啡Pacific」，疑似影射因延誤而派餐券畀乘客嘅Cathay Pacific。
短片改編電影《Flight 7500》，以「咖啡Pacific Delay No More」為題，內容相當抵死，寸盡國泰近月見報新聞，條片喺facebook約有4萬人睇過。「預告片」經過重新剪接、配上新對白，片頭一開始就抽水話公司燃油對沖蝕80幾億「都見晒報」，就可以「名正言順派500蚊花紅」（實情國泰今年每人派5,000蚊花紅）。
唔只空姐被人惡搞，乘客都唔放過。片段中「男主角」解釋，點解成日delay都仲坐「咖啡Pacific」，原因竟然係「隨時收番75蚊Coupon」，諷刺國泰因延誤，對乘客嘅補償只得75蚊餐券，而呢75蚊有乜用呢？咪啱啱好夠買兩杯咖啡囉。
《咖啡Pacific Delay No More》
http://bit.ly/1WXLtkk