鐵皮車、金髮洋娃娃、換衫公仔紙……大家見過未？港人愛懷舊，幾名本土懷舊收藏家即將舉辦懷舊市集，將收集得嚟嘅逾300件、遠至50年代嘅懷舊玩具、時鐘同陶瓷等心頭好同大家分享。
收藏家Stanley Ho話，60年代以前嘅玩具因簽署英聯邦國家互免關稅做貿易，所以產品會印上「Empire Made」，「其實好多人都唔知Empire Made係香港製造，反而60年代之後先改做Made In Hong Kong」。佢話早期製造玩具嘅物料主要係塑膠同鐵皮，部份顏料可能有害，加上未必符合玩具安全條例，如鐵皮車嘅角位尖，易整損小朋友，好難再出產。
Stanley話要收集有關藏品唔易，唔少玩具已出口或被丟棄，有時會喺夜冷店尋到寶或由有心人送贈。懷舊市集本周六、日（4月2日至3日）中午12點至晚上7點喺JL Ceramics Concept Shop（旺角太子道西202號2樓）舉行，費用全免。