告魯夫（圖）上星期去世，呢位荷蘭球王除咗喺荷蘭建立足球帝國之外，仲將版圖擴展到西班牙嘅巴塞隆拿。不如小弟咖喱幻想自己係《墳場新聞》嘅特派記者，落去訪問吓告魯夫。
記：皇家馬德里年年買星，你覺得佢哋成功嗎？
告：每個位置都用最好嘅球員，唔可能得到一支最強嘅球隊，你只會得到最強嘅11個人。
記：C朗成日抱怨隊友，你覺得咁適合嗎？
告：有啲球員唔係領袖但走去做領袖，淨識喺人哋做錯嘢之後鬧人。真正領袖應該時刻有心理準備，每個人都會犯錯。
記：摩連奴今季喺車仔一敗塗地，你點睇？
告：贏過冠軍之後，球隊就唔再百分百狀態，而得番90%；就好似汽水咁，你扭一扭蓋，入面啲氣就會少咗。
記：你覺得雲格同摩連奴邊個勁啲？
告：踢得好睇但冇成績，叫廢；踢得唔好睇但有成績，叫悶。
記：今季李斯特城咁神奇，點解呢？
告：要原因嘅咩？點解我哋唔可以擊敗嗰啲所謂豪門！我未見過一袋錢識入波。
記：上周場曼市打吡，曼聯把握到迪米捷利斯呢個漏洞贏波。
告：嗯嗯，我都會確保對方最廢嘅球員成日控球，咁我可以
最容易搶番個波。
記：但曼聯進攻成日都好迂迴，雲高爾係咪好有問題？
告：踢足球好簡單，踢簡單足球係最難。
記：即係咩意思？
告：我想你明的話，我自然會解釋清楚。閻王畀咗1,000億我搞波，一陣仲要返天堂搵尤西比奧傾條件，好忙呀！人嚟，同我送返個記者返陽間。
文：咖喱