廠商會噚日舉行傳媒午宴，咁啱同日有報道話會長李秀恒雖然冇表態參選9月立法會，但近來表現積極，有傳其支持者仲建議原屬接任廠商會議席嘅大熱、即第二副會長吳永嘉明年改為競逐廠商會會長。
結果唔少傳媒飯局中追問兩人嘅參選意向，但佢哋齊耍太極，吳永嘉話任何崗位只要適合，都願意嘗試；李秀恒就自言若冇合適人選先考慮，又指廠商會有唔少精英。二人仲應傳媒要求笑晒口搭膊合照，唔知係咪私下先龍爭虎鬥？
講開廠商會又點可以唔提工展會？副會長戴澤良話今年第一次去澳門搞工展會，原本擔心反應唔熱烈，所以只搞3日，結果反應超出預期，3日人流近10萬，營業額估計近億，所以已book定出年再搞，仲延長至5至7日。