行政會議逢星期二開會，作為特首嘅「內閣」，要就政府最高政策、機密事項進行討論及畀意見，就算係非官守成員，都應睇重每次會議，確保次次出席！
八方睇過行政長官辦公室回應立法會特別財委會嘅書面問題，發現有兩位非官守行會成員平均出席率不足八成，最低嘅係史美倫（圖），平均出席率得74.5%，佢其實上任首年出席率達9成，之後每下愈況，出席率都係得七成左右。
近期掛住「整頓」港大嘅亞瑟王李國章不遑多讓，平均出席率得75%，但八方覺得可以體諒，皆因佢2012至13年度出席率得38%，拉低整體，而當年佢係陪太太到美國醫病而要請假。