郭偉亮（Eric Kwok）喺電影《老笠》摸崔碧珈36E巨乳，又疑似口交，前晚套戲喺九展搞首映，Eric老婆葉佩雯（Grace）現身監場，Eric就尷尷尬尬，對住黑色窄身低胸裙嘅崔碧珈目不斜視，仲同老婆一齊受訪，Eric笑笑口話：「戲裏拍得越投入，返到去越死得快！」Eric話拍嗰陣都冇時間諗老婆嬲唔嬲，只係返到屋企好攰要瞓覺，企喺側邊嘅Grace就話：「係呀！不過我都準備好晒玻璃俾佢跪，唔見佢𠵱家隻腳仲滲緊血咩？」
「頭兩次好尷尬」
咁今次Grace係唔係嚟監場先？佢話：「唔使監場啦！都拍完啦！佢未接戲嘅時候，個劇本我都睇晒！我仲同佢講正喎好多發揮嘅地方！以我所知佢身邊男性朋友好多都好羨慕佢！」有冇介意先？「唔會介意！我之前都拍過戲，都係同男對手，最緊要都係劇情有需要。」
講番摸崔碧珈嘅36E，Eric話：「哎！摸胸嗰幕都NG咗6次，頭兩次都好尷尬，後來導演話我唔夠肉緊咪落去，佢仲親身示範，不過係咪我隻手同屁股，後來我就掌握到個力度。」Grace忍唔住話：「呢啲戲份一定要肉緊啲，如果唔係你摸落去，係咁NG都冇意思。」
崔碧珈話今次拍戲獻出最親熱嘅一次，喺首映見到Eric太太有冇尷尬先？佢話：「咁又唔會，我都有同佢say hello，我諗佢都諒解嘅。」
撰文：馮仁昭
