毅信控股(1246)公佈「先合後供」,股價被狂質,昨日開市後急瀉,插38%至0.01元,創上市新低。
毅信公佈,擬「25合1」,合股後計劃供股,由金利豐證券包銷,擬股份「2供11」,供股價為0.165元,較理論價每股0.4元,較前收市價0.016元折讓約58.75%。所得款項淨額約為8.87億元,其中約4.2億元擬用於償還債務,而餘額約4.6億元擬用於進行收購。
該股昨日一開市即大瀉38%,早段仍有勇士衝入博反彈,最高見0.015元,及後已低見0.01元,成交竟達到40億股,涉資4300萬元。該股自2013年10月上市,股價長期低波幅,去年4-7月期間翻生炒作,高見0.252後不斷下試,今日更已創上市新低。
股票機所見,毅信只有沽盤沒有買盤,情況極為罕見。但根據成本紀錄,有散戶以200元買入一手(兩萬股),希望博一博。而稍為大手投資者,則斥資達三十萬元買入。
香港投資者學會主席譚紹興表示,毅信控股(1246)以昨日收市價計算,市值只有2.5億元,以近期殼股叫價7億元是相當超值;昨日公布又合股又供股,估計是大股東街貨太多,所以向下炒收貨,如果今次收得唔夠乾,可能再合再供,直到貨源歸邊,再供要大股東掏荷包,整個行動才會告終。
最近殼股有兩種炒法,第一是直接賣殼,另一可能趁供股避免全面收購,去做股權易手,要留意供股後會否出現新大股東額外供股,只要所持股份不超過三成就不會觸發全面收購。譚紹興又認為,自2008年後不少殼股都出現向下炒情況,證監會及港交所(388)應該要正視問題,唔好俾股份趁供股股權易手。所以如果手多多入咗貨的散戶,呢幾日一反彈就要散水,等震完再睇情況,而家就唔好博喇!