本地股壇老手關百豪搭上騰訊（700）老闆馬化騰，會有咩火花？時富金融（510）噚日宣佈與騰訊策略性合作，開發「港股通」發展移動交易平台，騰訊客戶可即時、直達呢個港股交易平台。
時富金融發言人話，呢個平台唔止報價咁簡單，真係可以交易、落盤。當然，所有客戶都要先成為時富金融客戶，照足程序開戶之後，先可以用到呢個平台。
時富金融董事長關百豪喺新聞稿講到明，係為咗深港通即將推出，希望為內地客提供平台，掌握投資先機。簡單啲講，即係時富金融會利用騰訊嘅網絡吸內地客。
關百豪旗下實惠，早前宣佈會冠名贊助毛記電視，個個以為佢撐香港本地文化，轉頭又同騰訊合作搵真銀，實行中港兩邊走，盡顯生意人頭腦。時富噚日亦爆升19%。