復活節假期不出外，在家放縱一下，星期日凌晨四點起身睇德國在柏林迎戰英格蘭。國際足球友誼賽通常無甚睇頭，唔睇唔慌有損失。但英格蘭今季有新星冒出頭來，譬如19歲嘅迪利阿里（Dele Alli），四年前仲係做業餘球員嘅贊美華迪（Jamie Vardy）（29歲），及出道第二季暫為英超首席射手嘅22歲哈利肯尼（Harry Kane），適逢經常無精打采嘅隊長朗尼養傷，新人有機會出場，左丁山好想知道英格蘭班新人能否抵禦世界冠軍德國。
德國雖非精銳盡出，但還有世界級球星上陣，下半場早段入一球，加埋上半場領先，加埋就係二比零，以為英軍輸梗啦，點知一班生牯仔冇老大哥在場壓陣，反而有活力奮起直追，趁德國稍為鬆懈，就憑肯尼與華迪射入兩個美斯式入球追和，跟住壓住德國嚟踢，完場前憑一個角球由22歲防守中場艾力戴亞（Eric Dier）頂入致勝一球，反勝三比二，創下罕有英格蘭作客德國嘅取勝紀錄。新人表現出色，迪利阿里更被BBC選為今場最佳球員，可以確定新人勝舊人，朗尼、張伯倫、禾確特、韋舒亞等幾年前主角配角，以後可以長坐冷板櫈。
睇完足球，又睇NBA，以為奧克拉荷馬雷霆對聖安東尼奧馬刺定有可觀，點知馬刺教練卜普域治老謀深算到極，每季到咗季後賽前幾個星期，就收起班年紀大球星鄧肯、柏加、堅奴比利，及有傷嘅李安納，用副選出場，仲係用打落一啲都唔緊張嗰種戰術，於是雷霆輕易大勝111對92，球迷大失所望。打波當然求取勝，希望攞冠軍，馬刺自1997靠運選得新秀狀元鄧肯加盟後，19年來都晉身季後賽，攞五次總冠軍，三位球星加埋，合共113歲，仍然在NBA顯威風，實在係奇蹟，得歸功於教練憑老資格，唔怕被批評，夠膽適時雪藏三人，等佢地有時間休息復元，球迷唔高興喎，佢完全唔理，此乃徹頭徹尾之體育現實主義，顧住理性，捨棄激情，旨在奪標，懶理閒言閒語，今季馬刺要破米高佐敦率領芝加哥公牛隊在主場連勝43場嘅紀錄，在主場就精銳盡出，作客則在取得季後賽資格後，求求其其，馬刺教練卜普域治之理性冷靜計算實在得人驚，難怪佢嘅徒弟史提芬居爾執教金州勇士隊追求勝利，追尋漂亮籃球，愈來愈受歡迎。今季NBA西岸最重要大戰，就係勇士對馬刺，作為球迷，希望激情贏實用，勇士勝利，就好似踢足球希望告魯夫贏碧根鮑華。