喺沉悶嘅國際賽期，韋斯咸喺周一下晝踢咗場精采嘅比賽，星光熠熠過英超，入波又停不了，就係麥克盧保紀念賽。
呢位「槌仔幫」隊長已經效力咗12年，所以球會幫佢搞場紀念賽，一呼百應，好多槌仔幫名宿都有返嚟代表韋斯咸明星隊，對盧保帶領嘅韋斯咸。明星隊有里奧費迪南、迪肯尼奧、舒寧咸、占士、比拿美、班拿約、柏加、達寧等；球迷亦熱情，約3.5萬張門票賣晒，坐爆烏普頓公園球場。
呢場最精采嘅一刻係明星隊射手艾殊頓入咗球靚波，令人拍爛手掌。當時明星隊一次右路傳中，艾殊頓施展倒掛金鈎，食到應一應入網。講有趣鏡頭的話，有韋斯咸現役門將阿祖安卡斯迪路，佢似乎一直都有顆前鋒的心，嚟到呢場表演賽，終於可以試吓入波，佢由後場帶波上去，明星隊班球員都冇認真阻攔，等阿祖安扭到入禁區射入。最終，韋斯咸呢場以6:5贏咗明星隊。