當世事變改，唔知「股神」畢菲特會唔會越難越愛？據外電報道，由於富國銀行不斷回購股份，搞到畢菲特嘅富國持股比例逼近10%。而10%係一個監管門檻，代表畢菲特如果想再增持富國，需要獲得美國聯儲局批准。
由於美國一直以來限制非金融公司與銀行之間嘅聯繫，所以投資者想獲取美國銀行一成股權，需要通知聯儲局與公眾，並且要得到當局批准。咁仲未夠，投資者仲要作出不干預銀行運作嘅承諾。
上世紀90年代，畢菲特都做過類似投資。當時佢為咗將美國運通嘅持股量增至10%以上，承諾喺運通股東會上，跟隨管理層建議去投票。
眾所周知，畢菲特係富國長期粉絲，佢自1989年開始投資呢間銀行，富國家陣仲係畢菲特投資旗艦巴郡嘅第一重倉股。富國銀行話佢哋都好重視巴郡，並多謝巴郡管理層對佢哋嘅信心。