小米近年好積極，手機、電視、空氣淨化器、淨水器、運動手環乜都出，雖然不少都惹嚟抄襲批評，但超低售價總成為話題。最新搞作真係同米字有關，推出「米家壓力IH電飯煲」。所謂IH就係Induction Heating(感應加熱)，多面傳熱比傳統底部傳熱飯煲煲飯更快更靚，但其他日製IH飯煲閒閒哋都賣3,000港元，呢個小米飯煲僅賣999人民幣(約1,190港元)，兼且可用手機app調節米飯軟硬度，認真神奇高智能。
剛完成嘅發佈會仲未有實機試煲，但部機4月6日已可於小米網發售。以往小米產品有人會話咁平爆炸都唔緊要，但今次真係食得落肚，又有冇人想試佢煲出嚟嘅飯係咩味道呢？真係令人好期待呀！
記者：司徒港燊
