告魯夫逝世後，巴塞隆拿諗緊點悼念至好；巴塞高層已經同告魯夫家人見面，問吓佢哋意見，而大部份巴塞球迷都認為，將魯營球場改名做告魯夫球場，係最好嘅做法。據西班牙傳媒統計，有65%受訪球迷贊成將魯營改名，其他建議包括為告魯夫樹立雕像、將14號球衣退役、將球場第14號閘口改名等。除咗巴塞，荷蘭足總據報會將阿姆斯特丹球場改名做告魯夫球場，唔知第日歐洲會唔會出現兩個告魯夫球場呢？