UNIQLO供應商、針織公司南旋控股（1982）今日起招股，主席王庭聰個樣好老實咁，估唔到佢都會講兩句笑。話說公司特登捐100萬畀公益金，自選上市編號1982，唔通係主席同夫人結婚紀念？王主席話：「1982年發生好多好事，同埋，做到100分，十全十美吖嘛。」
佢冇詳細講1982發生乜事，但呢個數又關十全十美乜事呢？真係考起大家。主席後來解釋，拆開1982，1加9等於10，8加2都係等於10，相乘就得出100。不得不讚主席咁都諗到，真有心思。遲吓教育局可以考慮搵佢做顧問，出啲刁鑽數學題目考小學生喎。
講番生意，王主席強調，「絕對唔會諗」出自家品牌，仲搞笑咁話：「好似養海鮮同做酒樓嘅分別。我養魚，唔會做酒樓。」