網購越嚟越普及，要突圍而出真係少啲腦汁都唔得，好似王維基嘅港視（1137）搞HKTV mall，定時定候就推出時令優惠推介，好似之前聖誕同新年咁，都借勢推出唔少優惠，身邊唔少朋友都有幫襯，但估佢唔到，清明節佢都有清明祭品產品推介。
登入HKTV mall網頁，搜索「清明祭品」，竟然有94件商品提供選購，一般嘅元寶、蠟燭、香同金銀衣紙都有齊，不過嗰啲紙紮iPhone、電視機就未有供應喇。但有成百件清明祭品俾人網購，都算係咁，唔知算唔算係網購史上首創呢？朋友知道後即問HKTV mall可唔可以將訂購嘅祭品直接送去墳場？可惜係唔得嘅，暫時只能送貨去住宅同商業地址，但各位孝子賢孫都可以考慮幫老人家網購咗先，總算慳番一程力水。