每逢iBond同人幣國債開售，中銀香港（2388）總會有位靚佬出嚟講解，嗰位就係睇財資產品銷售、全球市場副總經理梁偉基（Gary），不過佢前排已離任中銀。
華華聽聞，Gary去咗一間好新嘅美資股票經紀行做行政總裁（CEO），雖然升咗職，但公司有好多嘢要處理，而且呢個時世轉工亦都要相當勇氣，份工一啲都唔容易做，希望佢一帆風順啦。
咁以後iBond同國債，中銀會派邊位嚟講解呢？聽聞中銀信用卡副總經理盧慧敏（Mary）已經接任Gary個位，不過唔係完全接替Gary嘅工作，例如財資產品銷售會分畀另一位主管去睇。Mary之前喺渣打睇信用卡同私貸，去到中銀信用卡管理嘅範圍都係差唔多。中銀信用卡嘅高層都已相繼退休或轉職，有啲面目全非。