復活節長假期，個個都去玩，「新股女王」、中央證券登記董事總經理鍾絳虹（Pamela）都唔例外，仲喺facebook大晒着和服靚相！
佢話今次係多年以來第一次放咁長假，趁復活、清明假期，去日本伊豆浸溫泉、行山。睇唔出佢平時咁搏殺，行大室山卻畏高，真係慘。參觀修善寺、神社，Pamela就即刻醒神晒，着和服撐住把紫傘，古典味隔住個Mon到湧出嚟呀。
Pamela鍾意日本就全中環都知，但由上個禮拜放假放到下個星期三（4月6日）先返工，令人好羨慕。講到尾，都係因為新股市場咁淡靜，先令Pamela有機會偷閒，但佢話情願市場好，益市場好過益自己咁話。