英格蘭上場友賽喺冇養緊傷嘅朗尼之下，靠哈利卡尼同埋占美華迪入波而作客反勝德國3:2，即時令朗尼變咗雞肋。球迷話為咗英軍嘅將來，應該唔好再選朗尼；但三獅兵團主帥鶴臣同粉絲唱反調，死攬呢位30歲曼聯隊長之餘，仲想犧牲一個後衞騰出空間，等佢可以揀五個前鋒參加今夏喺法國舉行嘅歐國盃決賽周。
「佢值得贏到更多尊重」
英格蘭主帥鶴臣會揀23個球員參加今夏歐國盃決賽周，一般嚟講係三個龍門、八個後衞、八個中場同埋四個前鋒，但英國《鏡報》日前披露，鶴臣可能會帶多一個前鋒去法國，換言之即係揀五個前鋒。消息指鶴臣有咁嘅計劃，皆因三獅前線有太多又「弗」又有質素嘅球員，所以要有五個位先至夠。咁又係，𠵱家喺英超射手榜排一、二位嘅熱刺前鋒哈利卡尼同李斯特城前鋒占美華迪已經佔咗兩個位，被鶴臣評為英軍前線最好波、對荷蘭會正選嘅利物浦球員史杜列治亦都入硬；就算鶴臣喺阿仙奴孖寶韋碧克同禾確特當中二揀一，前線都去咗四個位，如果佢唔加多一個位到五個，邊可能選到朗尼呀？
鶴臣日前亦講明，朗尼喺今夏歐國盃決賽周仲會扮演重要角色：「我要重申，朗尼係我哋嘅隊長。而喺過去兩年，佢亦帶領得球隊好好，幫我哋喺外圍賽以10戰10勝嘅成績出線。家陣佢受傷，外界就趁機話唔要佢，講真我唔係好高興囉。佢值得贏到更多尊重，而唔應該係咁。」
鶴臣要畀個位朗尼，考慮到龍門同埋中場都唔cut得，咁惟有向後衞埋手。據了解，佢考慮將八個後衞減到得番七個，由於中堅史東斯同防中艾歷迪亞都可以串演右後衞，所以佢諗住向右後衞開刀，喺基爾獲加同埋尼達利基尼之間二選一，當中以獲加「中招」機會較大，因為佢易傷同埋冇基尼咁搶鏡。
基爾獲加勢成犧牲品
雖然鶴臣咁攬朗尼，但朗尼唔再受球迷歡迎乃不爭嘅事實，更有粉絲喺社交網站叫朗尼咪再返英格蘭國家隊。我求大俠都認為朗尼巔𥧌已過，不過佢話晒都係英格蘭史上入波最多（109場入51球）嘅球員，又踢過多屆歐國盃同世盃決賽周，大賽經驗非常豐富，所以鶴臣揀佢踢歐國盃都合情合理嘅；不過，以佢家陣嘅狀態，真係唔可能踢正選囉。
如果鶴臣真心想英軍喺歐國盃攞到好成績，就應該將朗尼放喺後備席，將機會交畀卡尼同占美華迪呢啲當「弗」射手喇。英格蘭今晚會友賽荷蘭，睇嚟卡尼同華Dee又係時候一展身手！
英荷鋼門連環不幸事件
乜嘢叫「無獨有偶」？睇英格蘭迎戰荷蘭場友賽賽前，兩隊都冇咗龍門就知。英格蘭嘅畢蘭特喺上周六反勝德國3:2一役勇戰受傷，掃描之後發現係足踝骨折，要唞三個月，都幾大鑊，相信六月喺法國舉行嘅歐國盃都唔使預佢。至於荷蘭嘅首席門將施利臣就喺練習賽時同前鋒亨特拉爾火星撞地球，撞到爆鼻，搞到荷蘭要補選熱刺嘅禾姆。