【港女潮話】唔怕臉頸兩截色 小麥色肌膚女星逆襲
韓國女團AOA成員雪炫樣靚係人都知，點知近日俾網民話佢化妝化到樣同頸兩截色，雖然「一白遮三醜」，但依家越來越 多亞洲女星都愛以一身小麥色肌膚示人，健康又性感，仲使乜吓吓化白兩三度？
記者：黃樂雯
謝婷婷一向鍾意大自然同動物，近年唔只落水底同海洋動物拍廣告，仲去埋非洲同野生動物影相，曬得一身小麥肌，好健康。
新生代代表Supergirls嘅吳嘉熙Cheronna都有一身小麥膚色，拍埋組員度更突出。
好耐冇見嘅李孝利一向好charm，2013年同音樂人李尚順結婚後搬咗去濟州島，上年宣告暫別演藝圈。台上舉手投足同健康膚色都貫徹「性感天后」呢個名。
Co Co蔣怡不嬲都唔係行白雪雪路線，呢身小麥色肌膚為佢加多兩錢異國風情，加埋白皙牙齒甜笑，目光又點移得開？
台灣名模王麗雅除咗有靚樣正身材，仲出名玩三項鐵人，做運動又曬得一身均勻小麥肌，幾多人恨都恨唔到。
雪炫呢下臉頸兩截色係有少少失手，屬另類「見光死」。