這天周一係復活節公眾假期最後一日，馬會安排舉行沙田日賽，日間天氣回暖，雖則頭場爆出「輕越直前」呢匹冷Win，但第二場開始就由大熱門直落三連勝。
當中第二、三場由蔡廐一對「翔惑」及「開心遊戲」分別勝出。到第四場四班1000米直路賽，輪到鄭俊偉馬房攞威，麾下新星「皇仁大師」贏完續配羅理雅，再跑同班同程，結果順利後上連捷，服役兩戰不敗，單Win及組合獨贏A1，分別派42.5及25元。
「皇仁大師」馬主團體成員，包括梁高美懿丈夫梁承達醫生，這天兩人拍拖拉頭馬。此駒認真厲害，上仗初出直路賽排最衰的1檔亦勝，今次3檔好不了多少，更負133磅，讓亞軍「歷險家」20磅，反而贏得更易，羅理雅僅臨尾推幾步便彈甩個半身位收韁贏馬。鄭俊偉亦為鎮倉寶「好好計」上周六敗走杜拜金莎軒錦標贏馬補數。
今場條Ｑ爆到杰撻撻，事關第二名是187倍黃皓楠座騎「歷險家」，搭「開心遊戲」連贏派三千六百幾蚊。蔣嘉琦的「港林飛魚」得第三，第四名係文廐初出自購新馬「御風雲」，四重彩派17萬幾。