東西方喺商業管理文化上經常出現衝突。著名維權投資者、對沖基金Third Point嘅基金經理洛布（Daniel Loeb），日前就發出公開信，促請日本7-11母公司Seven & i唔好以「任人唯親」方式去決定下任行政總裁人選。
洛布呢次咁批評人哋嘅管理層承繼計劃，係因為83歲嘅Seven & i行政總裁鈴木敏文，被確認有長期健康問題，投資者擔心佢會任命個仔鈴木康弘出任新行政總裁。洛布喺公開信話，Seven & i旗下日本7-Eleven總裁伊阪隆一先係接任嘅優先人選，及後又指下任行政總裁應該有能者居之，唔可以一味維護「鈴木王朝」。
洛布去年10月入股Seven & i，而呢次唔係佢第一次向日本企業埋手。洛布喺2013就年曾逼索尼（Sony）分拆，不過最後遭Sony拒絕，不過Sony喺洛布嘅催逼之下都發奮自救，其後洛布嘅基金喺2014年沽貨離場，賺到20%回報。