為咗見偶像，你可以去到幾盡？有位叫卡娜嘅美斯超級粉絲，將呢位阿根廷同巴塞隆拿球星個樣紋喺自己左邊大髀；阿根廷上周四喺世盃外作客贏佢祖國智利2:1，卡娜賽後就去咗阿根廷入住嘅酒店，將自己個美斯紋身騷畀保安睇，結果獲准同偶像見面，仲將兩人合照掟上社交網。另外，美斯日前受訪話自己最大嘅恩師係荷蘭名宿列卡特，直言當日唔係列卡特畀機會佢，將佢提升上巴塞一隊，佢都冇今日嘅成就。佢話：「所有教練都教過我好多嘢，但對我最重要嗰個始終係列卡特囉。」
C朗讚囝囝有料承父業
至於美斯嘅宿敵基斯坦奴朗拿度（C朗）日前表示，話佢個仔小C朗踢波都好叻，將來可以向球壇發展，步佢後塵成為職業足球員。雖然係咁，C朗話唔會逼個仔，等佢將來長大之後自己揀想行嘅路。