西班牙前晚喺友賽作客同羅馬尼亞踢成0:0，兩隊賽前都有默哀悼念荷蘭球王告魯夫，佢哋門將卡斯拿斯繼續保清白之身，仲將連續冇失波嘅時間增至710分鐘。咁都未算，呢位效力葡超波圖嘅34歲球員計埋呢場，總共幫狂牛兵團踢咗166場國際賽，追平拉脫維亞球員艾斯達夫積夫斯嘅歐洲最多頂國家隊喼帽紀錄。卡斯拿斯賽後話：「我好高興可以去到166場，成為其中一個上陣場數最多嘅國家隊球員。」
講番賽前，由於羅馬尼亞係歐盟內其中一個學童輟學率最高嘅國家，成18%嘅學童畢唔到業，一眾羅馬尼亞國腳為咗引起國內兒童嘅學習興趣，喺操練時都着上印有簡單數學公式嘅外套（圖），計啱條數就會知道嗰位球員嘅波衫號碼，認真用心良苦；香港隊都可以諗吓噃！